Da in Taiwan gits so es Mond-Festival. Dank dem hämmer de Dsischtig frei übercho. Mier händ denn üssere Chef gfröged, ob mier ächt de Mäntig au frei chönted ha, demit mier chönd es Rundräisli mache. Das isch denn für Ihn au gar keis Problem gsi. Und mier händ am Samschtig Morge chöne starte zu dem 4 Tages Abentür. Teilgno an dem Usflug händ d'Kate, dä Mike, d'Elisabeth, dä Thierry dä Curdegn (ja Iher händ richtig gläse) und dä Diego. De Cöcer isch aber in Taipei gsi und somit händ mier Ihn müesse go ufpicke irgendwo. Mier händ eifacht nöd welle ind Stadt fahre und somit hämmer am Cucu gseit, nimm en Bus oder en Zug nach Keelung (as chlises Fischerdörfli im Nord-Oschte vor Inslä) und wart am Bahnhof bis mier chömed. De Diego hät das eigentich e schlächti Idee gfunde, will er sich an Ziite erinnerd hät, wo de Curdegn ganz hilflos gsi isch wenn d'Hüüser höcher gsi sind als 5 m ;-) Doch es isch alles Guet usecho und mier händ nume 5 min am Bahnhof müesse warte. Mier händ extra no en Stopp igleit gha aneme schöne Strand damit mier nid z'lang warte müend und sihe da es isch ufgange. Ach ja, ganz vergässe z'säge mier sind mit em VW Bus (en neuä zwar, nid so steilisch wie dä vom Diego) vom Mike und der Kate und am alte Chlappercharä vo der Elisabeth unterwäg gsi. Derbi hämmer 4 Velo, 2 Keits, 3 Zält und unmengene vo ungsundem Food und Bier gha. Item, mier sind denn ebe vo Keelung witer in Norde gfahre und händ als erschts mal müesse ässe. Da mier an der Küste gsi sind isch es logisch gsi, dass mier ime Fisch-Resti glanded sind. De Curdegen, Kate und dä Diego sind ja bekanntlich nid die gröschte Fischässer und händ sich gfreut, wos au no feine brötetle Ris geh hät und Hühner. Aber ehrlich gseit hät au das Fisch Zügs dene drü pässlet. Nach dere Stärchig hämmer üs denn uf d'Suechi gmacht nach dene Stei wo in jedem Reisefühere beschribe sind. Isch denn au rächt idrücklich gsi und au so gföhrlich… de Theirry und de Curdegn sind öppe 5 cm hinder dä Rote Linie gstande und scho hät sich en andere Gascht (Taiwanese) Sorge gmacht und gfrufe und gheped sie söllend doch zrugcho, es seg z'viel z'gföhrlich. Mier sind relativ spat dra gsi und somit häts fascht kei Lüt meh gha am schluss und mier händ uf dere Landzunge ganz vorne e gmüetlichs Plätzli gfunde. Zrug bim Auto isch ed denn scho dunkel gsi und mier händ no kein schlafplatz gfunde gha. Zum Glück isch de nöschschti 7/11 grad döt gsi so hämmer grad chöne de z'Nacht pöschtele. Nach langer umfahrerei hämmer denn endlich es hübsches Plätzli gfunde zu m dusse im Zelt d'schlöffele. Also es grad am Strand gsi. Da isch eifacht no so e Betonmuur dezwüsched gsi, aber de Wind isch ja au nid z'verachte. Nacheme gmüetliche z'Nacht und Gschichte simmer denn alli is Zelt gschloffe und sind nur de starchi Räge gweckt worde und sind alli Froh gsi, dass Zelt so guet ghebed händ.

Am Sunntig isch es denn leider immer no e bitz am rägne gsi wo mier ufgstande sind. Aber nume für die erschti viertel Stund. Denn isch es torche gsi und mier händ üs de sportliche Site vo dem Weekend chöne widme. D'Liz, dä Thierry und dä Curdegn sind ufs Velo ghocked und sind händ e Rundi vo 75 km gmacht. De Curdegn hät's uh streng gfunde und mier händ denn au no usegfunde wieso. Die hinder Brems isch e bitzli z'fescht azoge gsi und da s'Rad es chlises achti gha hät isches immer gstreift und somit isch de Cöcer halt e bitz härter am trample gsi. De Mike hät sin Kite derbi gha und da de Diego scho lang hät mal welle das usprobiere isch es klar gsi, dass er am Strand blibt und das ganze mal usprobiert. Z'erscht isch aber de Mike inne und hät emal so richtig zeigt wie das gaht. Wo er denn ändlich müed gsi isch hät de Wind grad sini schwachi Phase gha und mier händ nüt bessers gwüsst als e Sand-Maus z'forme. Nach erfolgricher Gstaltig isch denn au de Wind wieder besser gsi und de Diego hät chum meh möge warte zum go Kite. Nach Absproch mit em Mike isch er denn ohni Board is Wasser zum z'erscht emal de Kite e bitz in Griff z'kriege. Denn isch ebe öppis dumms passiert… de Schirm hät zoge und de Diego us em Wasser katapultiert und das genau in Ric htig Strand. Er isch aber Glücklicherwies no vor em Strand glandet. Leider isch denn no e Böhe cho und dezueane no im Wasser en Sandhügel und scho isch die Hut vom Bei äwäg gsi. De Diego hät das ganze ignoriet und isch no echli witer am üebe gsi. Wo er denn zum Wasser usecho isch hät er denn gse, dass es doch e bitz schlimmer isch als agnoh. S'Verbandszüg hät müesse brucht werde, damit de armi Kerli nid verblüetet isch (Nei Mami Leibundgut… isch e bitz übertriebe und muesch Dier ei Sorge mache ;-) Es isch denn au scho wieder Zit gis zum ufbräche und de Cöcer zrug uf Keelung z'bringe damit er uf Taipei chunt. Er hät nid so lang chöne frei neh, will er ja nume es paar Wuche in Taiwan isch. Aber de Thierry und de Diego händ das sehr gnosse, dass er üs für die zwei Tag begleitet hät und hoffed, dass er de Wäg nach Taiwan gli wieder findet. De Rescht vo de Gruppe hät sich denn wieder uf de Wäg gmacht richtig Küste. Leider isch d'Autobahn döthi gschlosse gsi und mier händ müesse über e art Passstrass fahre mit öppe tuusig Kurve und es hät gschiffed. De Diego hät das ganze verschlafe und isch wieder ufgwached, wo s'Auto gstopped hät. Elfi isch es gsi und gsiffed häts au immer no, somit isch d'Entscheidig uf Motelsuechi gfalle. Mier händ denn au zimmlich gli eis gfunde gha und denn no was für eis… es Liebeshotel. Mier händ denn s'gröschte Zimmer bueched, das mit 3 Bett und händ so ganz e agnehmi Nacht verbracht, die einte mit Pistazie die ander mit Frau oder Fründin.

Am Mäntig Morge simmer denn bi Zite use, und witer in Süde gfahre richtig Taroko Schlucht. Nach ere 3 Stündige kurvige und superschöne Fahrt de Küschte entlang hämmer sie denn erreicht. Nach es paar Killometer in der Schlucht hämmer au scho üsses Schlafplätzli gfunde gah. En richtig schöne Campingplatz. Zelt ufgstellt und los uf en chline Spaziergang. Idrücklich isch es gsi und endlich häts emal nackte Fels gha. Die zwei Schwitzer händ denn grad müesse griff zum climbara sueche und sind is träume cho. D'Nacht isch cho und mier sind uf d'Suechi nachere heisse Quelle gange. Gfunde isch sie schnell gsi und Lüt häts au nöd soviel gah, will ja Mäntig gsi isch. Es isch ganz eifacht herrlich gsi, häsch chöne uswähle in welli vo denne 3 verschiden heisse Pools häsch welle ineligge und wenn's z'heiss worde isch bisch eifacht schnell zum Fluss abe go abchüele. Mier händ denn no Dütschi troffe (vo denne häsch nieneds Dini Ruhe) und es drü englisch Lehere wo am Trämpä gsi sind. Mier händ denn die arme Kerli mitgno zu dem Campingplatz will suscht während 2 Stund am laufe gsie. Bim Zält hämmer denn no es Würfellspieli agfange und derbi isch d'Eliabeth wo unbeding no hät welle spielä und nöd verstande hät, dass einigi z'müed sind sum spielä, igschlafe. Das isch denn au s'endi gsi vo dem Abig.

De letschti Tag vo üssere Rundreis isch denn abroche und mier sind in der Schlucht witer hindere gfahre und immer duruf duruf. Irgendwo hämmer denn emal ghalte und d'Liz und de Thierry sind ufs Velo gwächslet. Dä Diego het eigentlich au welle, aber sis Bei hät Ruhebrucht und somit isch er mit dä Kate und am Mike go laufe. Die erschti churzi Wanderig isch genau 5 min lang gsi und mier in dere churze Zit vome Hund agfalle worde. Aber de isch schnell i d'Flucht gschlage gsi. Nach dem Reinfall simmer denn halt witer gfahre und händ ganz z'oberscht uf em Pass (3200 m.ü.M) nomal en Alauf gno. Döt isch es denn au uh schön gsi und de Diego hät fürchterlichs Heiweh kriegt, wills fascht so usgseh hät wie in der Schwitz. Am Thierry isch es glich ergange eifacht nid uf em Wanderweg sindern uf em Velo bim ufestrammple. Döt obe isch es denn au chalt gsi und mier händ wiederemal eine vo de seltene Moment erläbt wo me chalt hät in Taiwan. Nach dene wunderschöne idrück isch es denn nume no abegange und e churzi Zit gradus und mier sind wieder zrug in Taichung gsi.

Es wundervolls Wucheend mit wundervolle Mensche isch z'Änd gsi…

zu de Bildli vo dem super Usflug