3 Wuche bevor mier uf Kenting gfahre sind, händ Kathy, dä Thierry , d'elisabeth und ich entschiede, dass mier uf Kenting gönd. Das isch ganz im Süde vo Taiwan und isch bekannt für die schöne Sandstränd und die schöni Landschaft. Leider hät denn Elisabeth am Abig bevor mier gange sind entschiede in Taichung z'blibe, will sie mit em Tony no echli hät welle Zit verbringe. Denn sind mier halt nume drite ufbroche. Am Fritig nach der Arbed simmer bi Zite abgfahre, demit mier no vor em grosse Verkehr nach Kenting händ chöne fahre. Üssi Fahrerin, Kathi isch de ganzi Weg nach Kenting gfahre und so hät de Thierry wieder emal de ganzi Weg chöne schlafe und de Diego het chöna d'Umgebig gnüsse und mit de Kathi rede. Nach 4 Stund simmer sind mier denn ohni erwähneswerti Zwüschefäll in Kenting acho. Das Hotel wo mier buechet händ isch denn aber leider überbueched gsi und d'Kathy hät mit all ihrem chinesisch üs es Zimmer organisiert wo viel viel besser gsi isch als das wo mier ursprünglich gha hettet. Es hät 2 riesigi Better drin gha und Tuschi isch nume miteme Vorhang abgrenzt gsi. Dä Usblick isch nur dur e chlini nid starch befahreni Strass gsi. Suscht nume Meer sowit wie mier händ chöne lueg. Da mier ja erscht am 10 öppe händ chöne izschegge im Hotel hammer ordentlich Hunger gha. Im Resti wo grad um de Egge gsi isch hats leider erscht am elfi wieder en Tisch frei gha und somit hand mier dänkt gömmer zerscht en chline Apero go nä. De Thierry hät gmeint, dass en Long Island genau s'richtige wär. Dä isch aber so gross gsi, dass de Thierry e bitzli käppelet gsi isch nachdem er de überdimensional grossi Tee trunke hät. In dem Resti hats denn en super z'Nacht ghe. Nach em z'Nacht simmer denn direct zrug in die Bar wo mier scho vorher gsi sind und händ witer die gueti Musig und de Alkohol gnosse. E netts Girl hät üs denn no es Bier adrület, wo mier aber schlussendlich selber händ müesse zahle. Nach dem mier gnueg gsesse sind isch es denn nüme wit gsi bis zum Hotel zrug. Wo mier aber devor gstande sind, hats Meer so verlockend grusched, dass mier eifacht händ müesse go bade. De Wäg zum Strand hät sich denn aber no e bitz erschwärt, da mier dur en “Scheisse” bach händ müesse. Die einte händ en grosse Gump gno und die andere händ wohl oder übel müesse dedur. Aber es isch einewäg wert gsi, will s'Meer isch so schön temperiert gsi und so suber, dass mier sicher 1 Stund am bädele gsi sind. Zrug im Hotel simmer denn nachere Tuschi nume no is Bett gheit und hend gschlafe.

Am nächschte Morge simmer trotzdem bi Zite ufgstande und händ en Müesli-Frucht-oh-so-fein Zmorge gha. Denach simmer go Velofahre… da mier natürlich nid gwüsst hend wo mier genau dure sölled hammer üs z'erscht informiert und schnell usegfunde, dass es ganz en schöne Rundkurs git wo öppe 50 km isch. In de Hälfti vo dem Ride hats denn no en zwüschestop ghe bim 7 Loch Wasserfall. Döt hät de Diego müesse e Abchüelig ha. Denn hats au scho wieder chöne witergha. Nach witere 5 km simmer an der Ostküschte gsi und döt isch es ja bekanntlich schöner als an der Westküschte. So simmer denn eifacht easy witertingelet und händ die wunderschöne Idrück uf üs iwürke lah. Wo mier denn zrugg gsi sind simmer grad direkt zu dem weltberühemte Stei im Meer gfahre und sind ufeklätteret zum abejumpe. De Thierry isch elegant wie en Pfiel is Wasser taucht. De Diego hät wieder emal gmeint er müessi plöffe und isch wie en Hampelma in der Luft ghanget bi sinem Retoursalto. Sklettere het üs denn doch grad au chli Freud gmacht und es sind grad Heiwehgfühl ufcho. Zimlich müed hämmer denn üs uf de Weg gmacht go ässe… wieder is gliche Resti wie de Abig devor, will das Curry döt so unglaublich guet isch. Zum Glück simmer underem Dach gsi, wills uf eimal uhuere agfange hät schiffe. So richtig, so wie undere Tuschi und das für 1 Stund. Denn hät öpper wieder de Hane abgstellt und es hät öppe 100% Luftfüechtigkeit gha. (De Diego isch ja eiogentlich extreme unfotogen…. Aber an dem Abig ... UNWIEDERSTEHLICH!!!!! ) Mier sind nach em Räge au grad fertig gsi mit em z'Nacht und sind ufbroche go shoppe an dere grosse Kenting-Strass mit all dene chline und grössere Lädeli. Es isch denn au glie wieder spat gsi und mier händ müesse go ligge. Am nöchschte Morge händ mier üs entschiede die glich Rundi z'mache aber in der andere Richtig. Es hät sich denn aber usegstellt, dass das ganz e saudummi Idee gsi isch. Mier händ 3/4 vo de strecki Gegewind gha. Am Diego hät das aber an dem Tag gar nüt usgmacht er hät irgendwie eifacht en starche Tag gha. D'Kathi hät aber e bitz glite und die zwei Herrä händ versuecht Ihre de ganzi wäg Windschatte z'ghä und s'Tempo hochzhalte. Doch wo mier denn in es Dörfli iboge sind wo nachere churze Abfahrt gsi isch und de Thierry und de Diego miteme 60-er bloched sind, hät sie denn de Aschluss verlore. Mier Gentlemen händ gwarted und das hät ihre denn eigentlich nöd so passt, will sie denn wieder hät müesse härter in d'Pedale trette. Aber sie hät das au no gschafft und somit hammer üs alli drei e Massage verdient. Die isch denn aber so schmerzvoll gsi, dass de Thierry fascht hät müesse brüale. Mit schmerzverzerte Gsichter simmer denn is Auto gstige und händ üs uf de Heiweg gmacht. De Thierry isch denn standes gemäss grad wieder igschlaffe und Kathy und ich händ wieder pläuderlet. Schlussendlich simmer wieder in Taichung gsi und händ üs uh gfreut uf de Mäntig zum go schaffe….