So endli hend mir Ziit zum mol e chli Brichtli schriiba. Mir hend aifach e sooooo viel ztua bim schaffe und ir Freiziit, dass mir am obe amigs nümme mögen schriiba…

jetzt hend mir aber gfunda, dass mir üsere Houmpeitsch jetzt endli mol e chli leba müand ihucha.

 

Also fönd mir vo vorna a:

De Thierry isch scho ca. 5 Wucha do in Taichung am schaffe für Truvativ. In de erste Ziit het de Matthias (Mättu) ihn müas ganz elai erträga. Isch jo nid immer so aifach. Noch dem er glandet isch und vonere schwarze Limousine vo Taipei noch Taichung brocht worda isch, het ihm de Mättu so mitere Schnellbleichi die ganz Firma zeiget. Natürli isch dUffassigsgohb no viel schlechter gsii als sus und drum het er jetzt no (und sicher au in Zuakunft) zkempfa mit de ganze Prozess (?). Öb das jetzt nur am Thierry lieht, hmm … mo muas do scho no säga dass mir in Taiwan sind. Also am erste obe isch den Badeanstallt agsait gsii. Das isch genau srichtige gsii nochere 24 stündige Reis. In de zweita Wucha hets denn e FNG (Fucking New Guy) Party geh. An dem Obe bestoht würgli glegahait de Firma zeiga was ma cha. Zum Glück het de Thierry jo unmittelbar vor Taiwan es 2 wüchigs Training absolviert. Somit isch das jo keis Problem gsii.

An einem Wucheendi isch denn no en Schwiizer, de Tinu, vo Taipei de Mättu und de Thierry cho gho bsuacha. Zuasätzlich isch no de Markus (en Gummihals vo Bergamont) derbii gsii. Er het in sim leba sersch mol Fondue gessa, und das in Taiwan! Er isch jo sogar serschmol in Taiwan gsii. Überigens schafft de Tinu au in de Bikeindustrie, nämli bi Manitou. Isch halt e chli wie in Sizilia doh, ei riese Mafia. Mir hend denn au no usagfunda, dass de Reinu im gliiche Rennveloverein isch wie de Tinu. Dwelt isch halt scho chli. Natürli hets an dem Obe Fondue ghe und es Bündnerplättli zur Vorspiies. Leider hets kei Kirsch und feine schwiizer Wiiswii gha do in Taichung. Viellicht schiggt jo mol öpper es Päckli, dört dörfts denn aber au öppe es Stückli Chäs (aber Vakuumverpackt und kei Emmetaler oder Greyerzer, de gits do nämli), e Dösli Schnupf (McCrystals), e chli Schoggi (Ragusaschoggi und oder Lintdth-Milch am liebschte), es paar Salamettli (vo Malbuner) und eba de Kirsch (de Reinu het ganz en guata) und suscht öppe no öppis selberbrennts. So jetzt weiss jede öppe was so ines „Care-Packet“ inecho sötti. Aber jetzt zrugg zu dem obe. Dört hend mir nämli no es paar schwiizer DVD gluaged.

Am Wucheendi druuf het denn Truvativ iglaad ufs 3 Tägigi Firmareisli noch Penghu (Peskadoren Inseln). Do het ma denn mol glernt was Sightsiing mit Taiwanese heisst. Buah, in in Car usa usam Car ine in Car, ussa, essa, schlofa, essa, …. Isch lustig gsii und ma isch endli mol us de Stadt usacho. Und prompt hets denn schier en Tota geh wegeme Sunnastich, villicht isch au no chli Alkohlo im Spiel gsii. Aber sicher isch das nid. De Mättu chan sich nämli nümma so recht dra erinnera.

Jo jetzt isch es scho fast scho so wiit, dass de Diego cho isch. Nämli am Zischtig in de nächschte. An dem Obe sind mir denn au alli zäma in die Badeanstallt go relaxe. Schön isches dört scho, aber eifach nid ganz billig. Doch au hüt hemmer jo en Grund gha zum das ufd Spesa abrechnig ztua.

Am nächschte Tag het denn de Diego so sersch mol richtig ind Fabrik inagluaged und die erschte Bilder gmacht. Das hett denn eigentli au de Usschlag gehe zum e Houmpeitsch zmache. Will bi sooo vielne Idrügg wo ma do het … die mua ma jo irgendwie verschaffe. Mir hend üs denn also grad am Wucheendi drahghöggt und noch ca 30h Arbetsziit isch das öppe gstande wo ihr do gsiand. Es isch halt nid so profi mässig, doch so chunt au jede drus was er mues drugge. Sogar dTaiwanese wo kei Dütsch chönd J . Also stolz sind mir vor allem au uf üsere Titelbalke. Het grad e chli öppis brucht bis mir das so gha hend wie er jetzt isch. So fertig mit plakiere. Am Mäntig isch denn dArbet wieder los gange. Das isch eba scho en Fluech, immer die blödi Arbet wo sWucheendi unterbricht. In dere Wuche hend mir denn dur en Kolleg vom Mättu üseri zwei schöne Bikes chöne erstho. Dodezue hend mir grad de ganzi erschti Monatslohn verprasst. Also de Diego het no nid mol en Monatslohn übercho, will er jo ersch grad agfange het schaffe und isch somit scho uf pump bi de Firma. Da isch do aber kei Problem, im Gegeteil, wenn e Firma ame Mitarbeiter Kredit git, heisst das nur guats für de Mitarbeiter. So isch da do. Mir hend denn Möglichscht alli Teile usgewechslet wo mer hend chöne neh vo üsere Bude. Ma fahrt jo schliessli mit dem uma wo ma selber verchauft und mit nüt anderem…