Wiikend in Chia yi

D'Föteli händ Iher ja scho chöne ahluege. Demit Iher au no e chli wüssed, was mier näbed em Fötele so gmacht händ en chline Bricht.

Am Mittwuch hät üs d'Nicole iglade zums Wiikänd im Süde z'verbringe. Da hämmer gar nöd lang zögeret und händ zuegseit. Ufgreggt wie chlini Spitzbuabe simmer am Samstig Morge verwached. Mier händ no abgmacht gah zum go Rännvelofahre mit em Mouni und sinem Kolleg. Dä Mounie isch dä dunkli vo denen uf em Föteli, sis Handycap bim Golfe isch überigens so um die 7. Das isch glaub zimli guat, oder? Mier sind also am 10i am Morgen mit üsene geile neuie Bikes, em Redbull (Thierry) und Magic blue (Diego), go fiile. Dä Mounie häts Tempo vorgäh und de Thierry isch nah cho. Dä Matthias und dä Diego händ da scho meh Mühe gha. Aber nach 60 km und 2 Stund 15 Minutä simmer alli heil wieder am Ursprung acho. Dos ziemlich heiss gsi isch, hät de Diego zerscht emal müesse uschpanne. Dihei hätts den zerscht emal öppis zhabere geh (Banane und Kornflakes) Denn düschele (nei mier händ kei Föteli vo däre Aktion gmacht, aber falls öpper unbeding sones speziells Föteli wot ha, chan sie das bstelle und mier schikets denn per mail … ;-)) und uspanne. Da mier gwüsst händ, dass mier doch einigi Ziit im Auto verbringe wärdet hämmer, no e CD zämegstellt, MvF 4 für die wo sich in der Mussig-s'Zene uskänned. Am Abig am halbi zehni isch denn d'Nicole zu Euis is Appartment cho und denn hämmer nur no uf Ihri Kollegein, d'May müesse warte, aber nume 5 Minute. Denn simmer losdüsed und nach guet anderhalb Stund in Chia yi a cho. Als erschts hät d'May Ihrere Kollegin dä Anne aglütet und sie gfröged wo sie isch. Im KTV und mier sölled au döt anecho. Sowit so guet, nur wo isch dä KTV. Mit dä Orientierig händs Taiwanese nid so guet. Sie känned super viel Wäg vo einem Punkt zum andere. Aber nid vom neue Punkt zum nächschte. Punkt. Dadezue müends an erschte Punkt zrugg, drum gits immer so riese Diskussione wenn ma noch am Weg froged. Jede kennt e chli es anders Wegli und Eggli und den mues das natürli erklährt werde… Aber das ghot jo jetzt ine anderi Richtig, mir wichen vom Thema ab. Also hämmer dä KTV nach 5 mal fröge und 4 verschidene Richtigsagabe denn doch no gfunde und händ d'Anne troffe. Mier sind denn sofort herzlich empfange worde vo dä ganze Fämelii und händ sofort müesse es Lied vo de Karaokemachine usueche und singe. „Knocking on havens door“ händ mier zum Beschte gäh und alli händ Freud gha. Es git sicher sälte so begeischteriti Falschsinger. Nach öppe einere Stund händ denn May, Nicole, Anne und zwei Schwöschtere (Uf em Bildli hine dra) vo de Anne üs zwei Usländer packt und sind in de Strasse vo Chia yi umegloffe und händ an einem Stand Frücht kauft und aneme ander en feine Drink. Isch uh dä fride gsi. Z'Nacht am drü simmer denn bi de Anne dihei acho. Die Autofahrt vo de „Stadt“ use ufs Land … het nümme welle höhre. Sie wohnt wie die meischte Taiwanese bi Ihrne Eltere. D'Muetter isch denn prommt au verwached und hät üs herzlich begrüesst. Mier händ denn au grad s'gröschte Bett übercho und sind dankbar go pfuse. Am nächschte Morge isch es nämli scho am halbi achti wietergange. Also witer-gange isch falsch gseit. Mier sind eifach gweckt worde und meh hät üs gseit dune gäbis z'Morge. Mier also was gisch was häsch go dusche und alege und denn abe. Jetzt nimmts Eui sicher Wunder was mä in Taiwan zum z'morge isst. Die wo jetzt dänket es git nur Ris die sind absolut uf em Holzwäg. Mer chan au Kellogs Kornflackes go poschte wenn meh will, aber das isch nid so guet wie das wome suscht um dä Egge überchunt (bim Chines). Mier händ also en feine Tan-Ping übercho. Das isch es verchlopfets Ei und e Schibe Speck und das alles in es chlieses Omelettli igwicklet. Uh fein gsi und genau richtig. Nid z'viel und nid z'wenig. Bi üs um de Egge choschtet üs das grad emal $25 NT, das isch zimli genau 1 Fr. Da chame sich in de chline Restauräntli de Buch voll schlah für 5 Fr. aber das chönd mir den mol sus no verzelle, mir wichen wieder emal vom Thema ab. Nach em Zmorge simmer denn uf de Pickup vom Mami vo dä Anne ghüpft und sind e viertelstund dä Hoger duruf gfahre. Obe ahcho simmer denn go laufe und händ die fantastischi Natur vo Taiwan erläbt. Es isch zwar heiss gsi und füecht und das scho am Morge am nüni, aber das macht einem gar nüt us wenn me mit so viel nette Wibli unterwägs isch und derbi die einmalige Idrück chan gnüsse. So simmer denn öppe nach einere Stund bim chline Tempel acho und händ e bitz verschnuft. Denn simmer de ganzi Wäg zrug und es isch bedütend eifacher gsi, wills nume no abegange isch. Wo mier denn ganz zrug gsi sind bim Mami vo de Anne hätts chüele Tee geh. Da chasch an jedem Egge (bim Chines) verchidenschti kühelti Tee und die bescht Fruchtsäft ha. Alles mit frische Frücht gmacht und super fein, will da d'Frücht eifach gschmak händ. Mier händ nume churz chöne raschtä und denn isch es scho los gange zrugg is Zentrum zum go ässe. Mier händ denn die vierti Schwöschter und Ihre Maa troffe und sind denn grad es rächts Grüppli gsi, zum dä Geburtstag vom Mami z'fiire. Mier sind denn so uf es Fischresti zuegstüred und dä Diego hät nur dänk „Oh nei“ Am Endi isch er denn froh gsi, dass er alles Probiert hät. Aber zrugg zum Afang vom ässe. Z'erscht hocksch ane und es chunt ein Teller uf sonen grosse Drehteller woh uf em Tisch montiert isch. Vor Dier häsch es Schäleli Ris und los gahts. Nah dis nah chömed immer neui Sache und am Schluss isch eis Bordell uf em Tisch. Mier händ Sache gässe, Wahnsinn. Da wär e mal dä Pirania gsi, brötlet aber alles an einem Stuck und muesch denn eifacht Stückliwis mit dä Stäbli ablöse und neh. Oktopuss isch zwar komisch zum dribise aber liecht süesslich und guet. Bi dä Austere hät de Thierry rächt zueglanged und dä Diego hett fascht dä erschti Biss über dä Tisch gspeutz. Uf einisch isch so fritierts zügs cho, Probiere gaht über studiere und lueg ah, super fein. Mier händ denn e bitz spöter usegfunde, dass mier jetzt grad Seepferdli verspisse händ. Und suscht häts no kantonesische Ris (brötlet mit Gmüess und Crevettli), ä Ente, en hufe Gmüess, Schrimps ä ganzi Schwetti, Chräbs, Schwinsnierli (pfui, speuz, …) und suscht no en Hufe anders Zügs. Nach dem fürschtliche Ässe hämmer denn au e bitz müesse ruhe. Denn händ am Thierry und am Diego welle en uh schöne Strand zeige. Dadefür simmer 1 ½ Stund Autogfahre und da s'ja wie scho gseit nid so mit dä Orientierig händ, simmer denn halt bineme stinkende Hafe glandet und händ alli uf's Meer gstuned. Aber defür simmer nachher uf dä Fischmärt und händ wieder Sache erkännt wo mier vorhär grad gässe händ, dermal eifach in ganzer Grössi. Schlussendlich hät d'May no Ihres Grosi welä go bsuechewo „grad“ döt um dä Egge wohnt. Mier händ zwar absolut kei Hunger gha, aber es denn halt glich zwei ufgschnittni Öpfel geh. Am Abig am achti simmer denn uf dä Heiwäg und öppe am halbi elfi wieder in Taichung acho. D'Mädels sind denn no zu üs oppis cho go Noodle ässe und händ debi no es paar Föteli vo dä Schwiz z'gseh übercho. Mir hend mit bestem Wille nüt me chöne esse. Denn isch au scho wieder Zit gsiu zum go schlafe und mier sind richtig nudelfertig is Bett gheit nach dem superschöne und zfridne Wiikänd.