Chum hend mir wieder agfange schaffe hend mir scho wieder chöna ufhöra. Mir sind nämli am Friitig scho wieder uf de nöchschti Roadtrip gange. Wieder emol and Ostküste uf Taitong. De Hauptgrund isch de Triathlon vom Samstig gsii, de nächschti Grund natürli es Bsüechli bim Augustin.

Am Nomitag am 3i isch den de Froggy (Elisabeth) bi üs ufkrüzt, het natürli no nid alles erlediget gha wo sie het sölle und drum het de Thierry no schnell müesa mit em Scooter go poschte. De Diego und sie hend denn dBikes verlade und alles Gepäck in Kofferrum verstaut. Abfahrbereit sind mir denn so ca am 4i gsii. Das sind doch erscht ca. 1.5h verspöhtig uf üseri Marschtabella gsii. EASY, mir sind jo do in Taiwan.

Unterwegs hets denn natürli mol öppe es Raucherpäuseli geh für de Diego und e pipi Pause für dDame.

Noch ca. 3.5h fahre hend mir denn de zweiti Konvoi vo Taichung wo an Triathlon ghot igholt. De Thomas, Sarah, Kathy und de Pierre. Mir hend denn alli zäma Znacht gessa und sind hinderenand wiiterzoga.

Um die 9i sind mir denn im Hotel gsii und hend endli chöna sZimmer bezücha. De Diego und de Thierry hend es 4er Zimmer mit 3 Taiwanese teilt. Easy – das isch keis Problem gsii. Mir hend üs denn ufd Suachi noch de Hotelbar gmacht….

Am nächschte Morga hend sich denn alli Athleta bime Zmorga troffa. De Augustin isch denn au zu üs gstossa und het zur verwunderig vo allne Taiwanese under üs perfekt taiwanesisch gredet. De Mike und Kate heten eigentli au no wella cho zum üs azführa, doch isch leider Nike derzwüsche cho…

Noch eme Turbulente morga wo no alles het müase erlediget werde (Hoorbändeli, Velo pumpe, essa, trinka, Pipibox, Pedale wechsle, Ischribe für de Start … zum Glück hend dProfisportler de Diego gha wo unterstütze het chöna, müassa dörfa und was no vergessa gange isch no schnell schöne organisiere. Denn hets aber langsam aber sicher ernst golta. Zersch hets aber no es kommunals ufwährme geh.

De Start vom Triathlon isch denn am Punkt 1 gsii für dKathy, dElisabeth und de Thierry. De Thomas het den 10min später uf de Weg müasse.

Noch ca 31min isch den dElisabeth und de Thierry us em Wasser cho, denn isches aber grad wiiter gange ufs Velo zum die 40km zbodiga. Noch 2h 49min isch denn sRenna für de Thierry verbii gsii und noch 2h 50min für de Froggy, de Thomas (3h6min) und dKathy (3h13min) hend sRenna e chli länger dörfa gnüssa. Zfrieda mit em Resultat und müad vo dene ganze Strapaze het ma sich denn langsam in Richtig Hotel gmacht. Dört het e warmi Tuschi gwartet wo de ganzi Sand het müasa vom Körper wäscha. Überigens het de Diego alli 4 müase Koutschä und isch drum am müadschta gsii vo allne. Dezua isch jo cho, dass es de ganzi Tag richtig gstürmt het und de Diego de Chopf de ganzi Tag sozäge in Sand gsteckt het. Ma isch sich nämli würggli vorcho wie in de Wüaschti (am Diego gsiat mas au ah „ … can you catch my meaning …“ )

Nid ganz unerwarteter wiis het dElisabeth denn de 2te Platz gmacht in de Kategorie Dame. Das het denn sganze Grüppli im KTV besunge und betrunke. Natürli het sPriisgeld e chli müase drunder liide.

Am nächschte Morga hend sich denn alli wieder am Zmorga Buffet troffa und hend d'Sunntigsplän besprocha. De Diego und de Thierry hend unbedingt de Augustin no wella go bsuache, will ma dört so schön chan relaxe im Garte Ede. De Thomas mit Familie und Kathy hend sich denn bald du de Heiweg gmacht. D'Liz het sich e Massage gönt. So het aber am Schluss jede chli das übercho, was er het wella.

Nocheme schöne, gmüetliche und relaxde Nomitag bim Augustin sind mir denn satt (hend Buuraschüblig und Kääs gessa!!! Mässi viel mol) uf de Heiweg gange. Noch ca 5 ½ h sind mir denn wieder in Taichung acho und hend natürli no alles müase uspacke und wäsche und und und … aber da mir jo guati Huusmanne sind hend mir das „0,plötzlich“ erlediget gha.

Tja somit isch au es wiiters Weekend mit vielne guate Erlebnis am Endi zua gange und mir hend scho wieder müase and Arbet dengga und ans Training für de nächschte Wettkampf in Thailand – doch zerschtemol e chli Pause zum Chraft und Motivation ztanke!!

 

Clicke und d'Bildli alueg