zu de Föteli

Vor öppe 3 Mönet hend Petra, de Ans und ich d'Idee gha zum Thailand z'bereise. Also ursprünglich isch es emal de Plan gsi, dass die beide mich in Taiwan chömed go bsueche. Aber ebe erschtens chunts anderscht als zweitens me denkt.

Nachdem mier alli gwüsst hend wenn mier eigentlich wend gha und au üssi Cheffä das für guet befunde händ, händ mier üs alli mal es Ticked nach Bangkok bueched. De Ans und Petra vo de Schwiz us und ich vo Taiwan. D'Ferie sind immer nöcher cho und mini Vorfreud immer grösser da krieg ich es SMS vo de Petra das de Ans im Spital liggd… 2 Tag vor em Abflug. Meh het ghoffed und betted, aber es alles nüt gnütz de Ans isch eifacht nöd schnell gnueg wieder uf de Bei gsi. Ich bin denn super froh gsi, dass sich Petra entschiede het zum trotzdem nach Thailand z'cho… ich glaub suscht wärs mier denn nöd so lässig vorcho.

Da ich ja nume 3 Stündli bis uf Bankok han, han ich erscht am Sunntig müesse uf de Flüger. Bin denn aber scho am Samschtig mal i d'Nöchi vom Flughafe… de Curdegn go bsueche. Für die wos no nöd wüssed, de isch jetzt permanent in Taiwan… aber zrug zur Story. In Taipei sind d'Fraue eifacht irgendeswie hübscher als in Taichung... frei nach Gottfried Keller „Kleider machen Leute“. Jetzt mag sich de eint oder ander Läser fröge was jetzt das intertaiwanesische Geschwafel mit de Ferie in Thailand z'tue het. Ganz eifache… erschti aklimatisierig.

Am Sunntig morge isch es denn also so richtig los gange. Ich und min Rucksack sind vom Fahrer abgholt worde und schön gemütlich and Flughafe gfahre worde. Idchecke, 2 Stund warte… nomal e Stund warte, Verspötig vom Flüger, und endlich abflüge. Zum erschte mal in minem Läbe han ich denn so en „Priority“-Zäddel an minem Rucksack gha und somit isch denn de Rucksack au fascht z'erscht uf em Förderbändli gsi. Isch no cool, han ich mier denkt… wenn's doch es wänn anderscht gsi wär und nöd genau denn wenn ich nomal 2 Stund muess warte muess bis de Flüger vo Züri achunt. Wie gseit han ich wieder 2 Stund gwarted und au Petra het denn no e Stund verpötig gha. Aber es isch denn eigentlich doch no schnell zit gsi zum anestah und all die Taxifahrer abzwimmle und schlussendlich Petra willkomme z'heisse.

Ich muess ja ehrlich si… ich han mich ja nöd grad seriös uf die Ferie vorbereitet. Ganz anderscht isch das mit de Petra gsi… wobi sie natürlich au proffesionelli Hilf vo de Zulu gha het.

Petra het mich gföged öb ich e Ahnig han wo mier anne sötted und ich han gfunde ja… so in die Gegend, seg aber nöd sicher ob das Bescht isch. Petra het denn gmeint… nid so schlimm… mier gönd zu de Koh San Road und denn is Sawasdee guest house, weisch Zulu isch döt gsi und es seg günschtig und s'Personal isch fründlich. Ok, los gömmer. De Bus isch ja grösser und bequemer wenn so viel Gepäck hesch als es chlises Taxi und dezueane au no grad billiger. Isch denn au e gueti Fahrt gsi und mier in de Koh San road. Guet wo isch jetzt das Sawastee Guest house… döt ischs Sawastee Inn, döt ischs Sawastee resort, aber nieneds es Sawastee Guest house… z'erscht hemmer no welle das allei sueche aber d'Hitz und denn all das Gepäck händ üs schnell ufgeh lah und mier hend so es Tuk Tuk gnoh. De isch denn gfahre und gfahre und immer witer wäg vo de Koh San road… aber nach so 5 min hät er denn also doch vor em Sawastee Guest house ghalte und mier überglücklich emal nahgfröged obs es Zimmer frei hend. Nachdem mier 3 verschideni Zimmer aglueged gha hend händ mier üs führ Délux Suite entschide… Air Condition und eiges Duschi/WC. Da mier aber nonig grad hend chöne inne sind mier denn eifach emal losgloffe und hend de Weg zrug and Koh San road gsuecht. Die hemmer denn au ohni Problem wieder gfunde und denn au no es anders Sawastee Guest house… Das wärs denn au gsi, wo d'Zulu gmeint het. Mier sind denn döt grad emal ine und hend die Zimmer aglueged und hend üs denn entschide zum döt anezügle nach de erschte Nacht. Isch eifacht cooler gsi… also nöd s'Zimmer aber es het no guete z'morge gah und suscht allerlei z'ässe und z'drinke.

Nachdem mier jetzt scho über 5 Sawastee-irgendöppis gfunde gha hend, hämmer mal gfröged was denn das heisst und scho hend mier s'erschte Wort glerend gha… Sawastee heisst Grüezi. Viel dofer chasch es Hotel fascht nüme benamsle…

Zrugg im Hotel, nacheme mässige guet-Nacht-Drink und mitere lausiger Bedienig, het denn Petra gjömmerled, dass sie sehr wahrschinlich nid chan schlafe und drum morn müed seg. Ich bin is Bett gläge und sofort igschlafe. Am nöschschte Morge het d'Sunne glacht und Petra isch ganz ordeli zwäg gsi. Sie het sich grad vo afang a gwönt gha, kei Jet-lag nüt. Drum simmer denn au grad los is andere „Grüezi“-Hotel und hend grad chöne s'Zimmer bezieh und denn hets en guete z'Morge geh.

Bewaffned mit Chartene, Beschribige und Tipps vor Zulu isch es los gange uf shopping tour. Doch da hend mier z'erscht emal d'Wahl gah miteme Tuk Tuk, Taxi oder Bus and die erschti BTS station (Hochbahn vo Bangkok) z'fahre. Tja Bus fahre isch doch eifacht am beschte, billig und no anderi Vorteil wo ich gli druf z'spreche chume.

De Bus het doch grad voreme Schoopping center ghalte und Petra und ich sind inegstürmt nachdem mier beidi die genau glichi Rollträppe gföteled hend. Die erschte Ichäuf sind denn au scho gli tätiged gsi und de Diego hät nacheme Kaffi gschraue… zum Glück hend mier die super Charte debi gha mit allne Starbucks in Bangkok druf. Mier hend denn entschiede, dass mier nonig grad am erschte Tag alles müend pöschteled ha und sind denn an d'Busstation zum wieder zrug fahre. Uf em Heiwäg han ich denn d'Karte gstudiert und per Zuefall d'Route gfunde wo de Bus gfahre isch und das erscht öppe 2 am Nami gsi isch han ich vorgschlage no so e Sehenswürdigkeit go aluege. D'Petra isch begeischtered gsi und scho simmer us em Bus usegummped. Nach abentürlicher Bruggeüberquerig het d'Petra fascht an mier zwifled und gmeint mier hegend üs verrirt, bin selber au nöd ganz sicher gsi, aber glücklicherwis simmer eifacht dra here glofe. Mier hend als erschts de „golden mount“ aglueged wo frühener emal de höschschti Punkt vo Bangkok gsi isch. Vo döt obe (öppe 35m höcher als de rescht vo Bangkok, het me denn aber au en super schöne Blick über en grosse Teil vo de Stadt gha. Mier hend denn döt obe au grad neui Plän gschmided zum no anderi Sächeli go aluege. Wo mier denn aber wieder am fuess vo dem Hügel gsi sind hämer welle es Tuk Tuk neh. D'Füess hend langsam aber sicher weh tha. Zum Glück muess ich da fascht säge… de Tuk Tuk Fahrer het üs druf higwise, dass es da grad nebedrah nomal e Tempelalag het. Mier sind denn die go aluege und sind die einzige Touris gsi was de ganz speziell gmacht het. Ich han mich denn au wieder erinnered, dass ich schomal da gsi bin… 10 Jahr frühener mit mine Eltere. Nachdem mir üs satt glueged gha hend an dem erschte richtige Temple hend mier de Tuk Tuk Fahrer gfröged ob er üs no zum Wat Poh wür fahre… nei… de macht inere halbstund zue und das lohnt sich nüme. Aber ich chan eui no döt und döt hibringe. Mier gfunde das isch denn jetzt aber super Service und das ganze au nume für 10 Baht (normalerwis zahlsch mindischtens 30). Er het au en Vertarauenswürdige idruck gmacht. Er isch denn emal losgfahre und het gmeint mier sölled no schnell da in de Lade, denn kriegi er gratis Benzin. Guet mier gfunde isch ja scho en super Pris die 10 Baht, da chömmer also au no schnell 10 Minute in so en Lade. Wo mier usecho sind het denn de Fahrer gmeint er hegi kei Benzin kriegt, aber mier chönntendi doch no schnell in de ander Lade. Barmhäzig wie mier gsi sind hämmer üs das also no ime Stofflade atue und de arm Siech het immer no kei Benzin kriegt, will mier halt eifacht nüt kauft hend. Er het üs denn aber doch no zume grosse Buda gfüehrt und uf üs gwartet. Denn het er üs uf em Heiwäg no schnell s'Touri Zenter zeiged und gföged ob mier no schnell ine welled. Da mier sowieso en Tages Trip hend in Norde welle mache simmer schnell ine und nachdem mier use sind, e bitz weniger geld im Sack und e Vorfreud im Buch uf de nöchschti Tag zum go Temple in Ayuthaya azluege. Denach het de Fahrer üs bis vor s'Hotel gfahre und mier sind im Endefeckt doch no z'fride gsi mit em.

Da mier die Tour bueched gha hend hämmer müesse scho frühe is Bett. Die hend üs nämlich am Morge am 6-i scho abgolt und das in de Ferie.

Mier hend gwüsst, dass mier am Morge mit em Bus in Norde fahred und an verschidene Stelle halte werded zum Temple aluege und denn am Nammitag mit em Boot de Chao Phraya (Fluss) durab direkt wieder nach Bangkok. Da isch am 6-si denn würklich so en chline Bus vorgfahre (mier sind nid sicher gsi ob die tour denn au würklich statt finded oder ob mier jetzt a unfreiwiligi Spend an Tuk Tuk Fahrer gmachthend) und mier hend denkt tja das wird luschtig mehreri Stund in dem chline Büssli. Mier sind denn aber scho gli in en grosse, ganz neuiä Buss vesetzt worde. Also ganz feuidal. Es isch denn au scho glich los gange und den Reisebegleiter het sich vorgstellt mit Audi 2000 und het en rise Spass gha. Er isch ja eigentlich en liebe gsi aber er hett gschwätzt und gschwätz und das immer. Kei Pause. Da das ganze uf englisch gsi isch, also besser gseit Thaienglish het me wunderbar chöne verbilose und ganz anderi Sache diskutiere chöne. De erschti Stop isch denn bim zweitgröschte Budda vom ganze Land gsi. Z'erscht han ich aber en iheimische Zuckerwasser Kaffi gno… sensationell guet gsi. De Audi het denn wieder erchlärt und erchlärt und was mier blibe isch vo dem Tag isch, das die choge Burmese ganz gemeini Sieche sind. Es het näbed em super grosse Budda (16m) no so Steiruine gha (han leider de Name vergässe vo denen Türm) und da het me denn würklich gshe das da mal es wär gwüetet het und die religiöse Skulpture enthaupted het und au suscht a Schwi leidi tha hend. Bim nöschschte Stop hend mier denn so en liggende Budda aglueged… da hend mier glerend, dass wenn en Budda d'Auge offe het, denn tuet er sich nume usruhe in dere ruhende/stützende Position. Het er aber d'Auge zue isch er tot und im Nirvana, de höschschte Stufe vo Reikernation. Denebed hets nomal so en Turm gha und dehinder e wunderschöni Gartealag. Nachere churze Witersfahrt simmer denn no d'Summer Residenz vom König go alueg… ah ja für die wos nid wüssed, Thailand isch e Monarchi und immer am Morge am 8-ti und am Abig am 8-ti glöglets in der ganze Stadt und d'Lüt müend ganz ruhig döt stah und am König gedenke… Mer het sich für de Palascht müesse ordentlich kleide. Für de Diego gar keis Problem, bin ja au en Ma, heheh, Petra het wie immer en Sarong de bi gah und scho isch si Lady like durch die Parkalage gwandlet. Isch no schön gsi…

Schlussendlich simmer denn uf em Bötli gsi und es het Z'mittag geh, es Buffet mit vilne verschidene guete Sächeli. Und denn simmer glaub öppe 4 Stund uf dem Fluss richtig Bangkok gschippered. Höhepunkt vo dem tripp isch die Insle gsi wo im Fluss isch und so gross isch, dass sie gar nöd als Insle wahrnimmt. Mier sind eigentlich die einzige gsi wo eifacht une im Spiessaal hocke blibe sind und nie ufs Dach vom Schiff zum a besseri Ussicht zha. De Audi het wieder is Mikrophon pläred und d'Boxe hend halt au im Spiessaal tha. Mier hend denn einisch d'Wolke bestuned und mier sind immer wieder an irgendwelche coolä Gebäude oder Fabrike verbigfahre. Wo mier üs denn Bangkok gnöchered hend isch es au wieder interresanter worde und vor allem hets en Hufe schöni Hochhüser gha wome het chöne phötele. Nach dem ufregende Tag simmer denn is Hotel und hend döt z'Nacht gässe. Es isch denn no relativ frühe am Abig gsi und da ich ja no en shopping Uftrag vo minere Schwöschter gha han simmer denn ufbroche zu de Sündemeile vo Bangkok wo glichzitig halt au de Night marked isch wo all die Fake Sache chash poschte. Da mier nöed genau gwüsst hend wos di Paptong road isch simmer denn z'erscht mit em Bus id d'Nöchi gfahre und hend denn es Tuk Tuk gnoh. De het denn 150 Baht welle, wills so wit isch. Er het gseit mier müessed 20 minute fahre. Petra het denn das grad emal uf 100 abeghandlet. De Fahrer isch denn los und nach öppe 5 minute het er gseit mier seged da. Da bin ich grad e bitz verruckt worde und han ihm 40 Baht i d'Hand druckt. Er het welle blöd tue und gseit mier heged 100 abgmacht. Denn han ich in z'ämme gschisse er heg ja au gseit 20 minute und nöd nume grad um de Egge. Er söll die 40 Baht neh und verreise. Da sich die Tuk Tuk Fahrer nöd gwöhnt sind, dass au emal en Usländer chan verruckt werde, het er d'Schnure ghebt und isch abdüsed… het ja immer no z'viel verdient mit dere churze Fahrt.

Uf alli Fäll sind mier denn ja ebe in de Paptong road gis und 1m gloffe und scho fascht ine Ping Pong show zerrt worde. Da het alles "nei" und "no" nüt gnützt… häsch eifacht devolaufe müesse. Nach 25 m hämmer üs entschide id Mitti go laufe. Döt hemmer denn au richtig agfange pöschtele. Am Afang no zahghaft aber am Schluss vo dere Strass hends kei Chance me gha. Petra und ich sind so richtig is händäle cho. Da isch doch de Stand gsi mit all dene Uhre gsi und Petra het eini uf eme Plakat gseh wo ihre gfalle het. Sie het dena gfröged und de Verchäufer het 4800 Baht welle (ca. 150 SFR). Petra het gfunde ob er no z'rette wär, sie chämi us de Schwiz em "Land der Uhren" und die Uhr seg nume 500 Baht wert. Nachere halb Stund hend sich denn die zwei uf 1550 Baht geiniget gha (47.30) geiniget gha. Was Petra nöd gwüsst het, dass sie da e Uhr kauft het wo in der Schwiz öppe 5000 SFR zahlsch, klar denn für e ächti, aber die fake Uhre sind fascht nöd z'unterscheide vonere ächte. Nach dere Patong Aktion und erfolgloser Suechi nach de Täschene vo minere Schwöschter simmer zrug is Hotel go schlafe.

Am Mittwuch isch denn Elektronik schoppe agseit gsi. Also hend mier müesse is MBK. Es het viel Elektronik gah… aber no fascht meh Lüt und die tuusig „feine“ Grüchli vo all dene Food ständ, het das shopping abentür zimlich verchürzt und mier sind scho gli wieder duse gsi. Da das ja e bitz wenig gsi wär für ein Tag z'erläbe sind mier ebe am Morge z'erscht emal mit em Böötli es paar Statione Flussabwärts gfahre und hend welle zum Wat Poh und denn no in Könnigspalascht. Wo mier acho sind het üs en nette Tahiländer, kleidet in Azug, agsproche und gfröged wo mier denn hi welled… Wat Poh het er zur Antwort kriegt… de isch zue, het er gmeint. Mier hend denn gfröged nach em Grund dadefür und er het gmeint was vo speziellem Tag und so witer. Mier beidi hends nid so rächt glaubt, wills ja ganz en normale Mittwuch gsi isch. De netti Herr het üs denn aber uf de Charte zeiget was me alles suscht chan aluege… dä Tempel und disi Statue und de Palascht und und und denn het ebe grad no die Fabrik da offe wome chönt… Charte ipackt und devo gloffe. Er het üs denn no hinderher grueffe und gmeint mier sölle doch zrug cho. Mier hend nüt dergliche da und eifacht Richtig Igang vom Wat Poh gloffe. Döt acho isch alles offe gsi, super. Mier hend denn sofort es Billet kauft und sind de super grossi ligendi Buda go aluege. Aber das isch nöd s'einzige wo die Alag z'büte gha het. Die ganzi Alag isch farbeprächtig gsi und meh het sich chum chöne satt luege ab all der Pracht. Am andere Endi vom Igang isch denn die berühemti Massage Schuel vom Wat Poh wo anschienend Thai Massage erfunde worde isch. Da mier ja die vorherige Täg viel gloffe sind händ mier denkt, dass so e Massage sicherlich guet tuet. Mier händ üs denn e Stund Aroma/Chrüter Massage gönt. Het guet tha, leider händ mier nachher de ganzi Tag kläbt wie es Zückerli. Wo mier usecho sind us em Wat Po isch denn scho de nöchschti hilfsbereiti Ma döte gstande und het üs gfröged wo mier hi welled. Er chön üs fahre für nume 10 Baht. Mier hend eigentlich vo Ihm nume welle wüsse wo de Igang vom Könnigspalascht isch. Da het er üs aglueged und gmeint, ob ich langi Hose de bi heg. Ich nei, werum? Ohoooo, kei Chance zum inne cho, me muess langi Hose ha und sowieso hüt chame nöd inne, alles gschlosse, spezielle Tag… da hend mier grad wieder d'Fluch ergriffe und sind halt eifacht drufzue gloffe und nach 15 Minute vor em Igang vom Königspalascht gsi. Döt häts denn au e grossi Tafle gha, dass me dene hilfsbereite Menschä nöd söll glaube sondern zum Tüfel jage. Mier sind denn inne und tatsächlich chan me nöd mit churze Hose oder Minirock ine. Aber das isch ja alles keis Problem, will me gratis so Überhose oder Sarongs chan uslehne. Also simmer trotz Gschlosseheit und falscher Chleidig innecho und hend zum zweitemal and dem Tag s'Mul fascht nüme zuekriegt. Es isch umerfend gsi all die Pracht und all das Gold überall wo aneglueged hesch. Es sind denn ganz dunkli schwazi Wolke ufzoge wo en Kontrast bilded hend wo die Farbepracht grad no meh hervorghobe het. Guet die Wolke sind nöd nume guet gsi… sie hend ebe au Räge bracht. Zum Glück nume für es paar Minute. Nachdem mier üssi usgleieni Chleider wieder abghe hend sind mier wieder richtig Fluss zum s'Böttli z'neh und no witer de Fluss derab vo wo me super d'BTS het chöne neh. Mier hend ebe no en Termin gha…Mier hend üs mit de Tina troffe. Das isch e Kollegin vo de Zulu wo in Bangkok läbt und mit Chind schaffed. Sie isch e ufgstellti Dütschi wo sit 8 Mönet in Bangkok wohnt. Vorher isch sie in Australie gsi für meheri Jahr. Z'erscht het sie döt gstudiert und denn het si döt agfange schaffe. Wos denn en Ableger vo Ihrer Firma in Bangkok gmacht hend, het sie die Glegeheit wahr gno und isch uf Bangkok. Sie kennt sich scho rächt guet us und het üs grad es super Resti zeiged wo mier denn sind go z'Nachtässe. Es isch es Thai-resti gehobener Klass gsi. Halt so en Ort wo als tourischt nie herä chunsch. Mier hend denn döet super gspieslet. Mier hend Tina denn no gfröged ob sie üs en Tipp chöni geh… öppis wo mier unbedingt no gsehn ha müend in Bangkok. Sie het denn gmeint, dass mier doch sölled e Kanal Boots Tour mache. Da farsch miteme Bötli dur die chline Kanäl und gsesch wie d'Lüt lebed. Gesagt getan…am nöchschte Morge sind mier denn frühe use und z'erscht emal mit em Schiff Fluss abwärts zu de letschte Station… döt het me denn so e Tour billig chöne bueche. Das ganze isch so öppe e Stund gange und mer het en wunderbare Iblick in d'Hinderhöf vo Bangkok gseh. S'Wasser het eigenlich zimlich gstunke und isch so richtig brun gsi, aber das het d'Chind nöd abghalte zum es erfrischends Bad in dere Gülle z'neh. Es chan aber nöd so schlimm si, will mier sind anere Stell verbi gfahre wos vo grosse Fisch numme so gwimmlet het. Zrug an Land simmer mit de BTS denn richtig Central gfahre… nei das isch nöd das in Züri und isch au nöd e Haltistell, sondern s'letschte Ichaufszentrum, wo mier no unbedingt hi hend welle. D'Tina het üs denn aglüted gah und da sie grad in de nöchi gsi sich hämmer üs wieder troffe und sind denn no ines anders Shoppinzentrum grad über der Strass. Mier hend denn für de Fritig Abig abgmacht, dass mier no eis go trinke gönd amene spezeille Ort. Mier müessendi aber langi Hose und gschlosseni Schue debi ha, suscht isch denn nüt mit astosse in dere Bar.

Wo mier denn wieder im Hotel gsi sind hemmer no en schlummer trunk welle aber da isch nüt drus worde, will am Donnschtig und am Fritig so en spezielle Budda Tag gsi isch. Da gits kei Alkohol im Resti. Guet denn hemmer halt en Fruchtsaft bstellt. Da wird jetzt mis Mami freud ha…

Am Fritig isch denn no China town uf em Programm gstande. Das isch au wieder am eifachschte per Boot erreichbar gsi. Wie meischtens sind mier denn ohni Plan eifacht emal drufzuegloffe und hend üs leite lah vo üssene Gfühl und das isch denn au ganz guet usecho. Mier hend nämlich de Petra Ihres Paradies gfunde. En Lade volle Chrälleli-Chetteli und einzelne Chrälleli. De Lade isch öppe 3 m breit und villicht 7 m lang gsi het siebe tuusig millione Chrälleli gha und 20 Lüt drin wo sich uf de füess gstande sind. Ich bin ja en guet Lädeler, aber das isch mier denn fascht z'viel gsi. Ich han denn Petra fascht müesse ussezere will Si sich in soviel Chrälleli verliebt het. Nachdem Petra ca. 2 kg Chrälleli zahlt het gha und mier dusse gsi sind us dem Lade hend mier entdeckt, dass die ganzi Gass voll isch mit Chrälleli, ich han denn all mis Gschick brucht zum Petra z'überzüge, dass mier im Beschte Lade gsi sind und de Rescht vo dene Chrälleli-Läde entweder billige Abschum vom erschte sind oder eifacht genau s'gliche hend. Wo mier denn de Fäng vo de Chrälleli entcho sind, hend mier gar nöd gwüsst wo mier sind und so simmer eifacht mal gloffe und wenn's möglich gsi isch immer döt wos kei Tourischte gha het. Mier hend denn eimal nach em Weg gfröged und sind eigentlich Gold richtig gloffe gsi. Mier sind denn dur engi Gässli glofe und hend Läde gseh wo Ersatzteili uftürmt gha hend bis under Decki. Schlussendlich simmer bim Sheraton Hotel usecho, döt han ich dazumal mit mine Eltere übernachted und da han ich grad schnell ine müesse und luege obs immer no glich usgseht… ich chans Eui leider nöd verrate, will ich nöd weiss obs anderscht usgseht oder nöd aber ich han grad gar nüt wieder erchänt… Mier sind denn s'letscht mal ufs Böötli de Fluss derab und uf BTS… mier hend ja ebe mit dä Tina abgmacht gha. Nachdem mier üs troffe hend simmer denn mit em Taxi zum Banjang Tree Hotel gfahre und ich han mich denn no gschnell mini Schue gwächslet vor em Hotel Igang, d'Hose han ich scho gwächslet gha in der Umziekabine vome Shopping Zentrum, wo mier no schnell gsi sind, will mier no e bits z'frühe am Treffpunkt gsi sind. Mier sind denn in Lift und Tina het de oberschti Stock agwählt. Wo mier denn obe acho sind hend mier nomal 2 Stöck müesse d'Stegge durf und denn isch es usegange ufs Dach. Und denn nomal e Stegge ufe und denn bisch ganz z'oberscht gsi und döt hets es Reschti gha und e Bar. Alli Hüser rund ume sind tüfer gsi und me het e atemberaubendi Ussicht gha über ganz Bangkok. Mier sind denn döt ghöckled und hend eis trunke und gredet und gredet bis es ganz dunkel gsi isch und die ganz Stadt in es Liechtermeer daucht gsi isch. D'Petra und ich hend üs denn uf de Wäg is Hotel gmacht und Tina hei.

Am Samschtig isch üsse letschti Tag in Bangkog gsi. Mier hend es paar Tag vorher en Flug uf Koh Samui und es Hotel bueched. Mier hend am 12-i zum Hotel dusse sie müesse in de Koh San road, also hend mier mal usgschlaffe und sind denn zume spate z'Morge und hend denn de Rescht vom Morge und frühene Nammitag verbracht mit läse. Denn so geg die 3 simmer denn ufbroche zum nomal tina go bsueche und zum gseh wo sie wohnt und denn no uf en „Kaffe und Kuchen“. Das kaffi Hus wo sie üs denn nöd unwit vo Ihrere Wohnig zeiged het, het genau so guet in Züri, NY oder Paris chöne si. E edels Örtli, igrichted mit grosse Sofas und herrlich offe mit grosse Feischter. Die chline feine Dessert wos döt gha hend sind phänomenal gis und ich bin erstund gsi, dass es in Asie so öppis git. Es isch denn langsam Zit worde zum uf de Flughafe z'gha. De Taxi fahrere het denn gfröged wenn de Flüger gaht… am 8-i han ich aghe… es isch denn ebe scho 10 vor 6-i gsi und me brucht öppe e halb Stund bis zum Flughafe. Ich glaube er isch froh gsi, dass er het müesse presiere… er isch gfahre wie de Henker und het drängled wie en verruckte. Mier sind trotzdem heil acho und da de Flüger ja sowieso erscht am 8:20 gange isch simmer genau schön 2 Stund vor Abflug döte gsi. Mier hend denn grad idscheckt und es isch wieder emal s'Warte losgange. Aber die Zit isch denn schnell ume will mier viel z'beobachte gha hend. Da isch zum Biebspiel das Päärli gis, wo direkt vom Porno dreh cho isch oder zum nöchschte underwägs gsi isch. Sie hend beidi en dumme Cowboyhuet agha und sie isch in Hotpants umeghöselet, aber das isch keis luege gsi… ah ja und s'beschte isch gsi, dass beidi Heidi-Zöpf gha hend und er die längere als sie. Isch en guete Lacher gis.

De Flug nach Koh Samui isch nume e Stund gange und so sind mier am spote Abig uf em Chline häzige Flughafe vo Koh Samui acho. Mier hend denn scho gli üsses Gepäck gha und sind uf d'Suechi nach eme Transport zu üssem Hotel. Das het denn au ganz guet klapped gha und nachere halb Stund Fahrt simmer au scho dötte gsi. Das Hotel isch am Lamai Beach gsi und het Orchid Suite Resort gheise. Mier hend nöd gwüsst was üs erwarted, will döt wo mier bueched hend hets kei Bildli gha nume die netti Frau wo üs gseit hät, dass sie scho viel Lüt döt ane gschickt hät und alli z'friede gsi seged. Mier hend guet entschiede Ihre z'vertraue, will mier für wenig Geld en chiline Bungalow mit Duschi/WC kriegt hend und denn erscht no mit Klimaalag. Mier sind froh gsi, dass mier so viel glück gha hend mit dem Hotel. Uf alli Fäll han ich uf em Flug vo Bangkok s'Fuetter nöd gern gha und so han ich jetzt spat am Abig en Hunger gha… Da mier sowieso nonig so müed gsi sind, hämmer üs uf de Wäg gmacht an Strand zum luege obs es chlises Reschti hät zum was habere. Das isch denn au erfolgrich gsi und ich han nöd müesse verhungere. De erschti Idruck vo Koh Samui isch super gis… zu dere Jahreszit isch es ruhig und s'Meer isch au warm gsi... gseh hend mier leider nonig so viel will sja scho 11 in der Nacht gsi isch.

Am Sunntig hend mier eigentlich nöd viel gmacht. Mier sind an Strand und hend de ganzi Tag relaxt, gläese, plansched und die gruusig Pizza vo dem Ticinesi gässe wo döt es Restauräntli hät. Am Abig hend mier üs denn uf d'Suechi gmacht nacheme Reschti an de touristischte Strass. Mier sind denn bime Dütsche wo e Reagge bar het go ässe und denn na no e bitz go lädele.

Am nöchschte Morge hend mier üss denn es Töffli gmietet… so en chline halb automat… also nüt rächts. Aber es het glanged zum die ganzi Insle z'erkundige. Mier hend üs denn sofort uf de Wäg gmacht mit dem Roller sind go tanke und denn eifacht wieder emal druf los. E Tafle het üs denn druf higwiese, dass es da Wasserfäll het wo me chan aluege. Wo mier de Abzwieger gfunde het simmer aghalte worde und eine het üs versuecht e Elefantetour z'verchaufe. Nix da Elefantetour... Zrug uf de Töff und witer isch es gange zu dem Wasserfall. S'Erschte wo mier gshe hend isch de chli Elefant gsi grad näbed em Parkplatz. Mier hend de Töff abgstellt, nöd zahlt, und uf de chlini Grauhüter zuegstüred. Mier hend denn mit em gspilt, also ich vor allem, hend em Banane gfüetered und denn isch es sowiet gsi, dass mier glich uf e Elefantetour sind. Los… rited mier zu dem Wasserfall per Elefant. Nachdem mier s'Ticked kauft hend isch es denn scho gli los gange und rumpel die holper richtig Wasserfall… also z'erscht emal öppe 200 m devo ewäg und denn im chline flüssli wieder duruf 250 m und denn häsch de Wasserfall zwüsched de Stei und Bäum e bitz gseh. Aber de Elefante Ritt isch glich no luschtig gsi. Mier sind aber denn no per pedes sälber nöcher an de Wasserfall und ja, er isch schön gsi. Zrug uf em Töffli isch es denn witer gange eifacht de Nase na. Mier hend denn e Strass verwütscht wo mier eigentlich gar nöd welle hend, zum Glück. Wo mier wieder s'Meer gseh hend isch da so en chline Spunte gsi. Mier hend gfunde, dass es da sicher öppis guets z'Ässe git und was z'trinke, isch ja au grad Mittag. De Wirt isch super fründlich gsi und het üs Spiescharte bracht. Da hets aber nöd nume z'Ässe drin gha sondern au no diversi Usflüg. Nachdem mier üses Clubsandwich verzeert gha hend han ich d'Petra überzügt gha, dass sie nöd wird sterbe bim Schnorchle. Mier hend denn grad am nöchschte Tag e Tour bueched zum go Koralle schnorchle. Uf em Heiwäg han ich denn per Zuefall no es Schild gseh mit der Ufschrifft „Budda Footprint“. Vollbrems und zrug zu dem Schild. D'Petra het sich denn 10 minute vonere chline Thailänderi helfe lah müesse de Sarong um d'Schulter z'wickle under de stränge Bewachig vome Mönch wo immer wieder drigschured het und das ganze I d'Längi zoge het. Nach dere beluschtigende Aktion simmer denn hunderti vo Steggetritt de Berg duruf gchraxlet und hend de Abdruck bestuned. Zrugg am Lamai beach simmer no schnell go schwüme und denn isch es scho wieder Zit gsi zum go ässe. Da isch am Abig vorher es Schwizer Chrüz gseh han an eine vo dene Restaurants han ich unbedingt döt ane welle zum go luege öbs was Rächts hend. Ich han irgendeswie e riese Luscht uf Röschti gha und da isch doch das Rahmschnitzeli mit Röschti genau s'Richtige gsi. Ich weiss selber, dass es e bitz en Witz isch uf Thailand z'gha und denn Röschti z'ässe, aber da ich sit über 8 Mönet kei Röschti oder suschtigi Herdöpfelgricht usserd Pommes gha han isch das mini Chance gsi das wieder eimal zha. De Chef vom dem Retaurant/Club/Escortservice isch de Willy gsi wo eigentlich nume i de offene Chuchi gsässe isch und alli andere umetirigiert het. Aber er hät üs denn no es „Vitaminli“ spendiert… Vodka und Zitronesaft iisgkühelt.

Und scho isch wieder en Tag verbi gsi.

Am nöchschte Morge hend mier scho bizite wieder usemüesse. Nacheme rasche z'Morge isch simmer denn wieder uf em Scooter richtig Weschte gfahre um üs mit Schorchel und Taucherbrülle ustatte z'lah. Petra isch denn also super froh gsi wos no Schwümmwestene geh het. Nacheme guete Kaffi isch es denn au scho losgange. D'Überfahrt isch schnell verbi gsi und mier die erschte döt. Sofort is Wasser gumped und Brülle agleit. Wo ich d'Auge ufgmacht han, han ich nume no Fisch gseh. Üsse Böötlifahrer het Banane is Wasser grüert gha und drum sind die Fisch so anecho. Isch uh idrücklich gsi. D'Petra isch denn mit de Veschte underwägs gsi, ich übrigens au und so sind mier denn am umegleite gsi im Wasser und hend die Koralle aglueged. Es isch nöd so farbeprächtig gis wie me das immer im Fernseh gseht aber da es für üs s'erschte mal gis isch, isch es doch super idrücklich gsi. Mier sind denn au s'letschte Bötli gsi wo abgfahre isch. Mit üs isch es älters britischs Ehepaar debigsi und e Thailändischi Kollegin vo denne zwei. Also eigentlich isch das d'Ehefrau gsi vom englishe Kolleg. Uf em zrugwäg zum Strand hend mier no e chlini Pause gmacht ufere chline ander Insle wo nume 2 Lüt läbend und e Perlefarm underhalted. Mier händ aber im sichere Abstand gankered will de Bsitzter vo dere Perle Farm es grosses Gwehr hät. Zrug bi dem häzige reschti vo mier dä Trip bueched hend häts no en feine Z'mittag gehe.

Mier sind so geg die 3 wieder im Hotel gsi und hend beschlosse für eimal an Hotelpool z'gha und döt e bitz z'läse. Döt hend mier denn no ganz e spezielle Film drülled...

Am nöchschte Tag hend mier beschlosse zum die ganzi Insle mit em Töffli z'umrunde. Das hend mier denn au gschafft und hend villi stopps igleit. De erschti stopp isch am Hafe vo Koh Samui gsi, aber döt simmer nöd emal vom Scooter gstige, es drum ebe so fescht gstunke, dass mier s'wite gsuecht hend. Denn händ mier de grossi Budda aglueged. Das isch en arme Cheib. Die hend de Budda so anegstellt, dass er Landiwärts lueged, debi wär döt e super schöni Ussicht ufs Meer gsi. Ich denke mier aber, dass de Budda meh muess uf d'Lüt luege als ufs Meer… Rund um de Budda hets no viel chlini Lädeli gah aber mier hend guet der Versuechig chöne wiederstah. De nöchschti Stopp isch ganz im Norde vo de Insle gsi an einem vo de schönnere Stränd vo de Inslä. Döt händ mier wieder emal es Club Sandwich gha und en Fruchtsaft. Denn hend mier uf de Charte gseh, dass es no Stränd het wo nöd grad an der Strass liged und sind die go sueche. Eine hämmer gfunde aber de isch denn nöd so schön gsi. Und das Privatland gsi sich hend mier rechtsumkehrt gmacht. Da die Insle so chli isch simmer denn au scho am Chaweng beach acho… dä Touri ort uf Kohsamui… Aber zum go lädele ideal. Nachere churze Pause im Starbucks simmer denn uf Pirsch. Da hets denn scho no so das eine oder anderä gha wo meh het chöne ergattere.

Mier hend eigentlich mal welle e Baumhus tour mache wome mit Kabel und Chlätergstältli vo Baumhus zu Baumhus gleitet. Mier hend de Ort gfunde wos das abüted und hend de Pris gshe und vergliche mit ere grosse Schnorchel tour und hend üs denn es paar Stund spöter endschide zum nomal e Schnorcheltour z'mache.

Uf em weg zum Lamai beach, simmer am Cliff verbi gfahre und hend gseit, dass mer da inne müend es wänn, es paar hundert Meter witer han ich denn gseh womer zum z'Nacht gönd… s'Röschtiland… Im Hotel hämmer denn z'erscht emal de ganzi Staub müesse abwäsche. Und denn wie gseit simmer scho wider uf em Töffli gsi und underwägs zum Röschtiland, döt hused en Berner und het de Petra es feins Schnitzeli und mier es guets Zürigschnätzlets gmacht. Dena händ mier no e Partie Billiard gspillt und sind denn no uf en Drink oder zwei an d'Reagge-bar zum Dütsche.

Am nöchschte Tag… scho Dunschtig… isch denn wieder emal en Fuhllänzi-tag agseit gsi und mier hend meh oder weniger de ganzi Tag am Strand verbracht. Geg der Abig simmer denn uf d'Suechi nach some Lade wo me die verschidene Toure chan bueche. Das isch denn schnell erlediged gis und mier hend eifacht gwüsst, dass mier am 6:30 vor em Hotel müend warte. Das nonig so spot gis isch simmer nonig hungrig gsi, also sind mier zu dem Cliff Resti düsed und hend döt nochli die schöni Ussicht und de Wahl gnosse.

Am nöchschte Morge hämmer frühe uf müesse und mit em Buss bis in Norde vor Insle… döt hets denn z'Erscht emal en Z'morge geh, demit alli gstärkt sind für de Tag. Wo mier is Boot igstigge sind hend mier en Platz ganz vorne im Boot ergattered und hend üs gfreut uf d'Überfahrt. Die Freud isch denn aber schnell verfloge, will vorne isch es so richtig brutal. Da schlats die nume ume und wenn e grösseri Well cho isch denn hets di so richtig z'ämegstucht und de Käpten mit de Hasescharte isch kei bitz vim Gas ewäg… me muess de Zitplan ihalte. Wo mier denn acho sind het Petra Ruggeweh gha. Zum glück nöd so fescht, dass sie nüme het chöne die schöni Underwasserwelt gnüsse. Das mal hend mier zwei Underwasserkammera kauft gha um das Eregniss z'Phötälä. Nachere Stund in der erschte Bucht simmer wieder mit em Boot zume ander Strand gfahre und hend en Z'Mittag kriegt, denn isch es zrug gange uf drü chlini Inslene wo mit zwei wiise Sandstränd verbunde sind. Uf dene 3 Inseli hets 2 Resort mit chline Bungalows und es isch so richtig schön. Da müesst me nomal hi. Uf däne Insle hets denn nomal en Platz gha wo me het chöne schnorchle. Und mier hends nomal so richtig gnosse. Mich het denn no en Fisch mit em Stuck Brot verwächslet und i d'Hand bisse. Aber zum glück sind das nöd so grossi Fisch gsi.

Uf de Rückfahrt mit em Boot simmer denn meh hine ghocked und döt isch es denn nöd so schlimm gsi mit em umegrüet werde. Es isch aber es zimlichs Unwätter ufcho und es gschiffed was gisch was hesch. D'Welle sind au nöd grad chliner worde, aber mier sind denn guet acho uf Koh Samui. Am 5-i simmer wieder im Hotel gsi und hungrig vo all dere frische Seeluft. Also simmer no es letschtsmal an Strand und hend es Restuaräntli gsuecht wos öppis z'habbere git. Am 7-ni simmer fertig gsi mit ässe und au suscht völlig fertig. Mier wärend denn fascht go schlafe. Aber mier händ ja üse letschi Abig gha uf Koh Samui und da chame doch nonig am 7-i go schlafe. Also simmer mit em Töffli no e Rundi gfahre und schlussendlich ganz in der nöchi vom Hotel in e Bar. Döt hemmer üs denn zimlich schnell zu dena Maitla vo dem Lade dezueghöckt und hend mitnen plaudered und Jenga gspillt. Das isch de Hammer gsi wie mier immer höcheri Türm baut hend. Denn irgendeswenn isch no eini meh cho und het es zweits Jenga bracht und denn isch en super Turm da gstande und mier sind in es richtigs Fieber cho und das het bis in die frühe Morgestunde anneghebet. Am Samstig Morge hämmer denn no de Töff zrigbracht und sind zrug is Hotel go packe. D'Petra het fascht s'eint oder ander müesse döte lah. Ich hingege han eifacht bschisse und han es zweits Handgepäck, tarned alles billige Plastiksack, mitgnoh. Scho gli simmer abgfloge vo dere chline Insle und zrug nach Bankok. Ich han scho zimlich gli uf min Flüger nach Taipei chöne, aber öppter anderscht hät doch no es bitzeli länger müesse warte. Wo ich denn z'Nacht am 11 in Taipei glandet bin han ich schnell de Petra en schöne Flug gwünscht will si immer no in Bangkok am warte gsi isch. Ich han denn no super Glück gha. Wo ich zur Passkontrolle usecho bin han ich grad no de letschti Bus nach Taichung verwütscht. Am Morge am 2 bin ich denn endlich dihei gsi und han mich nume no is Bett gleit und die Ferie sind definitv verbi.

Ich möchte de Petra ganz herzlich danke, dass sie trotz de Umständ nach Thailand cho isch und so e super Reisebegleiteri gsi isch. Sind super Ferie gsi.

Hungrig uf Föteli vo dere Reis?